Шеф на американската Стратешка команда: Постои „вистинска можност” за нуклеарна војна со Кина или Русија
Шефот на Стратешката команда на САД, адмирал Чарлс Ричард соопшти дека е можна нуклеарна војна со Русија или со Кина. Тој ја изнесе својата оценка во напис за февруарскиот број на официјалното издание на американскиот поморски институт.
Ричард забележува дека по распадот на Советскиот Сојуз, Пентагон не морал да ја разгледува можноста за директна воена конфронтација со нуклеарна држава, но ситуацијата сега е променета.
– Постои реална можност за регионална криза со Русија или со Кина која брзо би можела да прерасне во конфликт со употреба на нуклеарно оружје, ако, според нив, постои закана за политичкиот систем или за државата во случај на пораз при употреба на конвенционално оружје, напиша Ричард.
Според адмиралот, не треба да се исклучи можноста дека потенцијален противник може да го искористи својот нуклеарен арсенал. Додека Министерството за одбрана на САД, додава Ричард, се фокусира на борба против тероризмот, Русија и Кина водат агресивна политика, оспорувајќи ги меѓународните норми на начини што се невидени од екот на Студената војна. Според мислењето на американскиот адмирал, ваквите постапки не треба да останат без одговор од Вашингтон.