Топлото време ги поттикна организаторите и промоторите на културни настани да реализираат што повеќе фестивали и проекти во овој период. Септември секогаш бил месец на многу културни настани, но сега гужвата се создаде поради непредвидливоста на ситуацијата со коронавирусот и дадената можност, според протоколите, настаните да се одвиваат на отворен простор. Така, само оваа недела ќе се случат неколку фестивали, а други се најавуваат за следната седмица.

Минатиот викенд со мотото „Потрага по допир“ се одржа одлично издание на „Танц фест“ со дводневен танц маратон во МКЦ парк, а публиката уживаше во магијата на петнаесет авторски кореографии на домашни и гостински кореографи, кои го одбележаа 30-тиот јубилеј на македонската современа танцова сцена.

Овие денови во тек е Скопскиот филмски фестивал, „Авалон“ три дена по ред имаше концертни настани на стадионот на АРМ, во Струмица се одржа фестивалот на камерен театар „Ристо Шишков“. Во тек е манифестацијата „Звуците на чаршијата“, од 14 септември почнуваат музичкиот „Денови на македонска музика“ и книжевниот фестивал „Проза Балкан“, додека следниот викенд почнуваат филмските фестивали „Скопје синема сити“ и „Синедејс“.

Насловната фотографија е од фестивалот „Танц фест 2020“.

(Текстот е објавен во „Културен печат“ број 48, во печатеното издание на „Слободен печат“ на 12-13 септември 2020)