Македонскиот репрезентативец Сефер Емини, кој настапува за дански Сондерјиске, очекува нашата селекција да прикаже квалитетна игра и да оствари позитивни резултати на претстојните пријателски натпревари против Босна и Херцеговина и Турција.

Иако сè уште го чека своето деби во сениорскиот дрес на Македонија, Емини потенцира дека најважно е тимот максимално подготвен да ги дочека предизвиците што следуваат, без разлика што натпреварите се играат по завршувањето на клупската сезона.

„Многу фудбалери сега одат на одмор, но ние сме тука, со репрезентацијата. Се подготвуваме максимално за овие мечеви и сакам да оствариме добри резултати. Имаме многу нови играчи, меѓу нив сум и јас. Уште немам дебитантски настап за сениорскиот тим, но тоа не значи ништо. Ќе работиме напорно за да се прикажеме во добро светло. Двата ривали ќе играат на Светското првенство, ќе ги сфатиме сериозно овие натпревари.

Најважно е да сме дисциплинирани во техничка и тактичка смисла. Ќе ги одработиме задачите на стручниот штаб, со надеж за добри резултати на овие тешки мечеви. Имаме квалитет во нашиот состав“, изјави Емини.

Македонија ќе одигра две контролни средби, прво против Босна и Херцеговина на 29 мај во Сараево, а потоа и против Турција на 1 јуни во Истанбул.

Јани Атанасов: Против БиХ одиме да се надигруваме и да победиме

ФОТО | Седлоски ги собра фудбалерите за натпреварите со БиХ и Турција