Се чисти депонијата кај Железничкиот мост
Град Скопје најавува дека во соработка со јавните претпријатија интензивно ќе работи на целосно чистење на оваа дива депонија
Огромните купишта на градежен шут, комунален отпад но и остатоци од кабаст отпад започнаа да се расчистуваат од страна на екипи на Град Скопје на депонијата кај Железничкиот мост на реката Вардар во општина Гази Баба.
На оваа депонија, како што соопштија градските власти, секојдневно се исфрла комунален отпад и градежен шут кој придонесува кон загадување на почвата, подземните води и воздухот, но пред се го загрозува здравјето на жителите од оваа општина.
Град Скопје најавува дека во соработка со јавните претпријатија интензивно ќе работи на целосно чистење на оваа дива депонија, која зафаќа површина од над 13.000 метри квадратни.
Меѓу другото, градските власти информираат и дека, деновиве целосно е исчистена и депонијата во населба Лисиче, која се наоѓа на улицата Ѓорѓи Крапчев на површина од околу 18.000 метри квадратни, со исчистена и транспортирана голема количина на комунален отпад, смет и градежен шут.
-Град Скопје продолжува со интензивно чистење на дивите депонии кои се мапирани на територијата на Скопје, а екипите на јавните претпријатија работат во две смени со цел побрзо и поефективно чистење и санирање. Дополнително, Градот воведе засилен инспекциски надзор и неселективно ќе бидат изрекувани големи казни за сите кои не го почитуваат законот, а со тоа и ја загадуваат животната средина и го загрозуваат животот и здравјето на граѓаните – се вели во соопштението од Град Скопје.