Инспекторатот за употреба на јазиците не е екипиран и сѐ уште не функционира во целост. Иако со Законот за негово формирање се предвидуваше веќе од 15 јануари инспекторите да почнат да пишуваат казни, досега на терен немаат излезено.

– Овие денови распишавме оглас за вработување шест лица. Еден инспектор веќе ги завршува обуките, едната деветмесечна и уште една тримесечна, а уште тројца наскоро ќе почнат со овој тип обука – изјави за „Слободен печат“ директорот на Инспекторатот, Фатмир Исени.

Според Законот, глоба во износ од 300 до 500 евра во денарска противвредност ќе му се изрече на правното лице ако не постапи во согласност со одредбите, а одговорното лице ќе заработи казна од 100 до 200 евра.