Се бара итна истрага за нападот врз Божиновски, реагираше и претседателот и другите институции
Се нижат реакции по синоќешниот напад врз новинарот Зоран Божиновски во Битола, кој според пријавата во полицијата го извршиле маскирани напаѓачи.
Препорачано
Здружението на новинарите на Македонија (ЗНМ) и Советот за етика во медиумите (СЕММ) бараат итна реакција од Министерството за внатрешни работи да спроведе брза и ефикасна истрага во интерес на пронаоѓање и санкционирање на напаѓачот врз сопственикот нa порталот „Буре весник” Зоран Божиновски.
Според објавите во медиумите, нападот се случил вчера вечер во Битола, пред неговата куќа и нанесени му се тешки телесни повреди од страна на две маскирани лица. Случајот е веќе пријавен во полиција.
– Го осудуваме секој облик на физичко насилство и потенцираме дека физичкиот напад претставува кривично дело. Апелираме МВР и ОЈО, итно да ги истражат и процесираат ваквите напади со цел да ги казнат оние кои го прекршуваат законот, но и да превенираат евентуални вакви кривични дела во иднина, велат од ЗНМ и СЕММ.
МИОА го осуди физичкиот напад врз новинарот Зоран Божиновски
Министерство за информатичко општество и администрација го осудува вчерашниот физички напад врз сопственикот на „Буревесник” Зоран Божиновски.
– Ние како Министерство за информатичко општество и администрација, одговорни за законите поврзани со медиумите, жестоко реагираме во врска со вчерашниот напад врз новинарот Зоран Божиновски. Како земја која се залага за европски вредности и влез во Европската Унија, мораме да создадеме соодветна клима новинарите да ги извршуваат своите должности и функции без пречки. Ваквите напади врз медиумските работници не придонесуваат за развојот на демократијата и толеранцијата, посочуваат од МИОА.
Бараат ургентно од органите на прогонот и истражителите да го истражат и расветлат случајот до крај.
– Виновниците да ја добијат заслужената казна и ваквите случаи никогаш повеќе да не се повторат, се наведува во соопштението на МИОА.
АВМУ го осуди физичкиот напад врз новинарот Зоран Божиновски
Агенцијата за аудио и аудиовизуелни медиумски услуги (АВМУ) најостро го осудува вчерашниот физички напад врз сопственикот на „Буревесник“ Зоран Божиновски.
– Безбедноста на новинарите е предуслов за професионално вршење на нивните обврски и секое насилство кон нив е апсолутно неприфатливо. Тие треба да ја вршат својата работа ослободени од каков било вид напади, притисоци, вознемирување и заплашување, нагласуваат од АВМУ.
