Светската тенисерка број 1, Арина Сабаленка се осврна на учеството на трансродовите спортисти во женскиот спорт, при што светската тенисерка број 1 вели дека би било неправедно жените да се соочат со „биолошки мажи“ во професионалниот тенис, пренесува „Гардијан“.

Политиката за учество на полот на Женската тениска асоцијација (WTA) во рамките на нејзината турнеја им дозволува на трансродовите жени да учествуваат ако го декларирале својот пол како женски најмалку четири години, ги намалиле нивоата на тестостерон и се согласиле на процедурите за тестирање. Овие услови може дополнително да ги менува медицинскиот менаџер на WTA од случај до случај.

Запрашана за трансродовите спортисти во интервју со Пирс Морган објавено во вторник, четирикратната шампионка на гренд слем Сабаленка рече:

– Тоа е незгодно прашање. Немам што да правам против нив. Но, чувствувам дека тие сепак имаат огромна предност во однос на жените и мислам дека не е фер жените да се соочат со биолошки мажи – се зборовите на Сабаленка.

Белорусинката, која беше во шоуто за да го промовира својот меч „Битката на половите“ со Ник Кирјос од Австралија на 28 декември, додаде:

– Не е фер. Жената целиот свој живот работи за да ја достигне својата граница, а потоа мора да се соочи со маж, кој е биолошки многу посилен, па затоа јас не се согласувам со вакви работи во спортот – кажа Сабаленка.

Во 2024 година, Британската асоцијација за тенис на трева ги ажурираше своите правила за да им забрани на трансродовите жени да се натпреваруваат во национални и меѓу клупски женски натпревари. Во изминатите две години, неколку спортски федерации започнаа свои студии или ги променија правилата за да им забранат на сите што поминале низ машки пубертет да се натпреваруваат во женската категорија на елитно ниво.