Романот „Ѕиркачот“ на Александар Прокопиев, објавен на македонски јазик во 2007-та, го продолжува своето преводно патување низ балканските јазици. Само неколку месеци по словенечкото, деновиве во познатото тиранско книгоиздателство „Фан Ноли“ излезе од печат албанското издание, „Përgjunesi“, во превод на Џемиле Жикај.

Инаку претходно истиот издавач, „Фан Ноли“, ја објави на албански јазик и збирката бајки за возрасни „Човечулец“.

– „Ѕиркачот“ за мене е посебно блиска книга. Ме радува што таа на свој ненаметлив, но сигурен начин, по својата објава на македонски јазик пред петнаесетина години, ги интригира странските читатели и критика. Така, преводот на „Ѕиркачот“ на италијански јазик има две изданија во две различни едиции – изјави писателот Александар Прокопиев.

(Текстот е објавен во „Културен печат“ број 201, во печатеното издание на весникот „Слободен печат“ на 21-23.10.2023)