Македонската ракометарка моментно ги брани боите на рускиот клуб ЦСКА Москва со кој има одлични резултати во Лигата на шампионте и е во трка за едно од местата кои водат во четвртфиналето сезонава.

Сара Ристовска која настапува на позицијата десно крило во интервјуто за рускиот веб портал „Брз центар“ зборуваше за амбициите и настапите со нејзиниот клуб со кој има договор до лето 2022 година.

Воедно зборуваше и за величината на нашиот најискусен репрезентативец, Кирил Лазаров кој е со националната селекција на Мундијалот во Египет 2021.

– Во Македонија го викаат едноставно и разбирливо – легенда. Човек на 40 години игра на неверојатно ниво. Тој е пример за карактер, ја има најбогатата кариера, титули, најдобар стрелец на најголемите натпреварувања и не застанува, оди напред. Лазаров би можел уште утре да биде селектор на македонската репрезентација. Тој има свој клуб, КЛ7, како инвестиција во иднината на нашиот ракомет – вели Ристовска.