Реал Мадрид денеска доби лоши вести во врска со повредата на својот играч од средниот ред, Џуд Белингам. Англискиот репрезентативец се повреди на вчерашниот натпревар против Рајо Ваљекано, а по дополнителните медицински прегледи официјално е утврден степенот на повредата.

Станува збор за повреда на бутниот мускул на левата нога, поради што Белингам ќе мора да паузира најмалку еден месец. Тоа значи дека Реал ќе биде значително ослабен во важен дел од сезоната.

Поради повредата, Белингам ќе ги пропушти натпреварите во Примера против Валенсија, Реал Сосиедад и Осасуна, како и двата плејоф дуели во Лигата на шампионите против Бенфика.

Очекувањата се дека англискиот фудбалер ќе се врати на терен на 1 март, кога „кралевите“ ќе се соочат со Хетафе.

Во досегашниот тек од сезоната, Белингам настапи на 26 натпревари во дресот на Реал Мадрид, при што постигна шест погодоци и забележа четири асистенции, потврдувајќи ја својата важна улога во тимот на „кралевите“.