Владата на денешната седница го разреши Марјан Спасовски од должноста директор на Управа за извршување на санкциите, соопштија од владината служба за информирање.

Како што претходно беше најавено, Спасовски е разрешен поради незадоволството од состојбата на затворскиот систем во земјава, а разрешувањето уследи само неколку денови по спектакуларното бегство на осудениот убиец Беким Мемети при неговото спроведување од КПУ „Идризово“ кон Ургентниот центар „Мајка Тереза“. За тоа кој ќе го наследи Спасовски на функцијата, засега, нема информации.

Освен за оваа, од Владата известија дека Вангелија Велева е именувана за директорка на Педагошката служба, по претходно отворен јавен оглас на кој што таа била единствен уредно пријавен кандидат.

Владата ја разгледала и усвоила и информацијата од Министерството за информатичко општество и администрација, за извршени преговори со Владата на Државата Израел, за соработка во областа на електронски комуникации и поштенски услуги и го разгледа и прифати усогласениот текст на Договорот.

Разгледана била и информацијата за изработка на проект за реконструкција и ревитализација на Старото училиште „Димитар Влахов” во село Љубојно и за негова адаптација во Центар за промоција на македонскиот јазик.