Раст на корупцијата во Русија
Корупцијата во Русија годинава е зголемена за 16,5 отсто во споредба со 2020 година, јавија руски медиуми повикувајќи се на документ од руското обвинителство за состојбата со криминалот во земјата.
Податоците покажуваат дека во 2021 година има околу 24.500 корупциски случаи, што е највисока бројка во изминатите осум години.
Околу половина, односно 12.100 случаи се поврзани со мито, и тие се за 27,4 отсто повеќе од минатата година. Најмногу вакви случаи има во регионите Санкт Петербург, Перм и Ставропол.
Минатата година, „лидери” во земање поткуп биле Москва, Татарстан и територијата на Ставропол.
Според официјалните податоци, во август штетата изнесува 39,4 милијарди рубљи, наспроти 32,4 милијарди во 2020 година. Претходно, руското обвинителство објави дека за цела 2020 година штетата од корупција изнесувала околу 63 милијарди рубљи.