Просинечки: Македонците не изгледаа добро против Молдавија, помотивирани ќе бидат против нас
Во понеделник од 18.00 часот во Анталија македонската фудбалска А репрезентација ќе одигра пријателски натпревар против Црна Гора.
Во петокот избраниците на селекторот Благоја Милевски на стадионот „Мардан“ ремизираа против селекцијата на Молдавија со резултат 1:1.
Милевски по тој меч истакна дека неговите фудбалери од создадените прилики можеа да постигнат уште некој гол, па пред утрешниот дуел посакува реализацијата да биде подобра.
И новиот селектор на Црногорците Роберт Просинечки е свесен дека Македонија не се покажа во најдобро светло против Молдавците. Просинечки најави во дека во однос на мечот со Белорусија кој го добија Црногорците со 2:0 ќе има дури 10 промени, а во стартниот состав ќе остане само Јоветиќ.
– Нè чека малку посилен противник, но клучното е што момците добро работеа во изминатите шест дена, атмосферата е добра, а секогаш е уште подобро кога победувате. Така е во фудбалот. Веднаш видов дека односот меѓу играчите е одличен, многу е полесно да се работи на тој начин. Тоа е суштината на сè. Се запознавме, се обидовме да наметнеме поинаков стил, да играме и сето тоа беше многу добро на првиот меч – рече Просинечки.
Црногорскиот селектор воедно го коментираше натпреварот на Македонија против Молдавија:
– Го гледавме натпреварот, не изгледаа добро Македонците. Сигурно ќе бидат помотивирани против нас, ќе сакаат да победат и да го подобрат впечатокот. Имаат одличен индивидуален квалитет, нивните играчи прават разлика во добрите клубови. Нема да биде воопшто лесен натпревар. Но, ние сме оптимисти, момците работат добро, а не се ни уморни бидејќи ќе го освежиме тимот. Сигурно ќе биде интересно – се зборовите на Просинечки.