Промовирани нови е-услуги во Куманово
Претседателот Стево Пендаровски денеска престојуваше во општина Куманово, каде што присуствуваше на промоција на нови е-услуги во центарот „Една точка за услуги (ЕТУ)“, информираа од кабинетот на претседателот.
На настанот беа промовирани услугите за издавање на уверение за регистрираните податоци во матична евиденција за стажот на осигурување, остварени плати и надоместоци – (уверение за стаж) и издавање на извод од компјутерски запис – образец М1/М2 од пријава/одјава во задолжително социјално осигурување. На промоцијата на новите е-услуги во центарот „Една точка за услуги (ЕТУ)“ во Куманово присуствуваше и министерот за информатичко општество и администрација Азир Алиу.
Претседателот Пендаровски имаше можност да ги искористи услугите во центарот од каде што му издадоа уверение за стаж и М1/М2 образец.
– Претседателот порача дека овој проект, чија цел е да овозможи ефикасни, брзи и достапни услуги, ќе им го олесни животот на граѓаните и претставува исчекор кон создавање јавна администрација како вистински сервис на граѓаните, соопштија од кабинетот на претседателот на државата.
Според министерот, дигиталната трансформација е неизбежна и неопходна за испорака на нови вредности во сите сектори од секојдневниот и работниот живот.
– Заради таа цел МИОА и Владата на Република Северна Македонија се залагаат за дигитализација на работните процеси, но и обезбедување на потребните законски решенија за дигитална трансформација на државата. Денеска ја промовираме услугата контрола на листа на логови за спроведен пристап до личните податоци на корисникот. Услугата обезбедува издавање на листа на логови за спроведен пристап до вашите лични податоци од страна на корисници на податоци, содржани во регистарот на население, кажа министерот.
Граѓаните можат да поднесат барање преку порталот и со тоа да имаат увид која институција и кога ги користи нивните податоци, со што се зголемува транспарентноста на институциите. Денеска беше промовирана и услугата потврда за содржани лични податоци во Централниот регистар на населението. Услугата вклучува потврда со која се докажува дали личните податоци се вклучени во регистарот и дали се точни како што се име, презиме, адреса. Министерот појасни дека е можно да има технички грешки и преку оваа услуга им се овозможува на граѓаните да ги исправат. Барањето се поднесува онлајн или лично.
– Целта на е-услугите е да се олесни пристапот на услугите, да се намалат трошоците без чекање пред шалтер и без разлика каде се наоѓате физички, кажа министерот.
Услугата е достапна на следниот линк.