Претставување и разговор со хрватската писателка и сценаристка Дора Шустиќ ќе се одржи во „Буква“

Плакат за настанот во „Буква“

Во кафе-книжарницата „Буква“, на 9 април (вторник), со почеток во 19.30 часот, ќе се одржи книжевен настан на кој ќе биде претставено творештвото на писателката и сценаристка од Хрватска, Дора Шустиќ. Модератор на настанот ќе биде писателот Владимир Јанковски.

На настанот ќе биде претставен нејзиниот роман „Пци“, за кој таа беше финалист за најзначајната награда за роман во Хрватска, наградата „Т-портал“, а ја доби книжевната награда „Драго Герваис“.

Романот „Пци“ ја раскажува приказната за младата жена која откако ќе се запише на славната Филмска академија во Прага се надева дека од животот ќе го добие сето она што го сака – „знаење, слобода, секс, работа, успех, љубов и пари“. Прага е градот на нејзините сништа, но и место во кое ќе се соочи со сите предизвици на животот. Кога на една забава ќе се запознае со постар харизматичен фотограф, таа се вљубува и се препушта на страстите, без да насети колку е моќна неговата темна енергија.

„Пци“ е роман за генерацијата миленијалци желни за слобода, пораснати да веруваат дека сè е можно додека суровоста на либералниот капитализам не ги сведе на прекарна работа во која нема место за идеалите на младоста.

Освен за романот „Пци“, Дора Шустиќ ќе зборува и за својата работа како сценаристка и режисерка, како и за другите прозни, поетски и есеистички дела.

Дора Шустиќ (1991, Риека) е писателка и сценаристка. Дипломирала политички науки во Љубљана и сценаристика на ФАМУ во Прага. Живеела во Истанбул, Берлин, Љубљана и Загреб, каде што моментално работи како сценаристка и развива свои филмски и книжевни проекти. Објавува кратки раскази, песни, новинарски текстови и есеи на хрватски, словенечки и англиски јазик.

Настанот е дел од резиденцијалниот престој на Дора Шустиќ во Скопје, поддржан од европската мрежа за превод и книги „Традуки“.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот