Од денеска вработените во УЈП не протестираат од 10 до 12 часот, како што тоа го правеа повеќе од еден месец. Во петокот е потпишан колективен договор каде што од една страна се јавува репрезентативниот синдикат во рамките на Управата за јавни приходи – „Солидарност“, а од друга страна работодавачот – УЈП. Со овој договор на вработените им е обезбедено зголемување на платите од 30 проценти.

Васе Неданоски од синдикалната организација вели дека со договорот вработените ќе си го реализираат правото за кое имаат законска основа, со што веќе нема потреба од протест.

– Имавме два основа за зголемување на платите. И со досегашниот колективен договор, според тамошната методологија, ние имавме право на повремени зголемувања на платите, но тие не се случија. Според тој договор, платата требаше да ни биде поголема за 30-ина проценти. Исто е и според член 66 од Законот за буџети. Нов колективен договор на ниво на работодавач се склучи затоа што имавме промени во однос на синдикатот, и сега репрезентативен синдикат за УЈП е „Солидарност“. Преговарачот успеа да ја презентира законитоста на растот на платите пред Министерството за труд и пред Министерството за финансии и задоволни сме од исходот – изјави за „Слободен печат“ Неданоски.

Директорката на УЈП Сања Лукаревска во телевизиско гостување потврди дека веќе од следната плата вработените во УЈП ќе го имаат покачувањето од 30 отсто и кажа дека овој договор е постигнат колегијално и транспарентно со мирно решавање спорови. Таа нагласи дека на процесот пристапиле внимателно, со цел да се спречи ефектите од евентуалниот штрајк што беше најавуван, а кој ќе имаше последици врз целата држава.

За првпат во преговорите е вклучен помирувач за работни спорови, кој преговараше со Министерството за труд и социјална политика.