Поранешниот селектор на САД и помлад брат на Џон Мекинро, Патрик нема дилеми кој е најдобриот тенисер во историјата по триумфот на Новак Ѓоковиќ на Мастерсот во Париз.

Ѓоковиќ со победата во Париз се искачи на врвот на листата по бројот на освоени мастерси, Србинот сега има 37, додека Рафаел Надал остана на 36 титули.

„Луѓе повторувајте по мене… Новак Ѓоковиќ е најдобриот тенисер во машка конкуренција… Во Историјата“, напиша Патрик Мекинро на Твитер.

Ѓоковиќ во триумфот во Париз исто така го обезбеди и првото место на АТП ранг-листата на крајот од годината по рекорден седми пат, исто така стана и првиот тенисер по Андре Агаси од 1999 година кој во иста сезона триумфал и на Ролан Гарос и на Мастерсот во Париз.

Следниот предизвик за Новак Ѓоковиќ е завршниот мастерс во Торино кој ќе се игра од 14. до 21. ноември.