Министерството за животна средина тврди дека пречистителната станица за преработка на отровниот исцедок од депонијата на фабриката Југохром од Јегуновце е во функција од крајот на минатата година, откако биле завршени набавките на неопходните хемикалии и резервни делови со набавките направени кон крајот на изминатата година.

Оттаму велат дека согласно Програмата за управување со водите за 2021 година, за пречистителната станица и СКАДА системот во Јегуновце за годинава биле обезбедени средства во висина од 9 400 000 денари.

„Слободен печат“ објави дека депониски отровни излевања непречено се разлеваат по нивите во околина на тетовско Јегуновце и исцедокот со шествалентниот хром завршува во реката Вардар.

Раководството на Југохром деновиве најави рестарт на фабриката наесен доколку успеат да ја довршат изградбата на филтерот за пречистување на фабричкиот оџак. Депонијата со рудна згура која му припаѓа на некогашниот полошки металуршки гигант, веќе со децении претставува еден од главните еколошки проблеми во земјата поради потенцијалната опасност шествалентниот хром да продре во подземните води кои го хранат изворот Рашче.