Порази за младинските селекции на Македонија во натпреварите со Франција и Холандија
Двете младински репрезентации на Македонија кои денеска имаа настапи во елитните квалификации за Европското првенство забележаа порази.
Препорачано
Фудбалерите до 17 години беа поразени од Франција со 2-1, иако први дојдоа до предност. Џангаровски во 22. минута реализираше пенал за водство, но радоста траеше кратко, Франција веќе во следниот напад израмни преку Лофондоу. Конечниот резултат беше поставен по еден час игра, кога Амауч погоди за пресврт и победа на „триколорите“. За оваа генерација, ова беше втор пораз, по стартниот од Германија со идентични 2-1.
Ниту селекцијата до 19 години не успеа да приреди изненадување, откако убедливо загуби од Холандија со 4-0. Противникот доминираше во текот на целиот натпревар и со по два гола во двете полувремиња рутински стигна до триумфот. Најрасположен беше Рулен со хет-трик, додека еден погодок додаде Беренс.
За репрезентацијата до 19 години ова беше прв пораз во групата, откако на стартот одигра реми против Фарски Острови, а во конкуренција е и селекцијата на Молдавија.
