Основниот суд во Приштина во средата донесе пресуда против поранешниот министер за инфраструктура Пал Лекај и уште тројца функционери во Министерството поради 53 милиони евра, кои косовската влада му ги исплатила на американско-турскиот конзорциум „Бехтел и Енка“ заради доцнење во плаќањето за изградбата на автопатот „Арбен Џафери“, кој ги поврзува Косово и Македонија.

„Судскиот совет ги прогласува за виновни обвинетите: Пал Лекај, Небих Шатри, Есет Бериша и Бесим Тахири. Тие сториле кривично дело злоупотреба на положбата или службено овластување или биле соучесници наведувајќи дека судот го осудува обвинетиот Пал Лекај на затворска казна во траење од три години и осум месеци“, пишува косовскиот весник Коха.

Судот му забрани на Лекај да врши јавни функции во јавната администрација во период од три години и шест месеци по завршувањето на затворската казна.

Лекај, како шеф на Меѓуминистерскиот совет за изградба на автопатот, го ангажирал својот советник Есет Бериша да преговара за дополнителните трошоци со компанијата. Со помош на Бериша, Лека „целосно го игнорирал“ мислењето на компанијата за надзор на автопатот, Хил Интернационал. Надзорот заклучил дека владата должи околу 14,8 милиони евра на Бехтел и Енка, чии „дополнителни финансиски барања“ ги нарече „целосно неразумни и неприфатливи“.

Со криење и непретставување на реалната состојба на другите членови на министерскиот совет, Лекај заедно со Бериша, им претставиле лажни факти… да препорачаат владата да го одобри барањето на „Бехтел и Енка“ за 53,1 милиони евра, за продолжување градежни работи, се вели во обвинението за случајот.

Сите обвинети се изјаснија за невини, а нивните адвокати најавија дека судската одлука ќе ја обжалат пред Апелациониот суд во Косово.