Федерална судијка во понеделникот ги отфрли кривичните обвиненија против двајца истакнати критичари на претседателот Доналд Трамп – поранешниот директор на ФБИ, Џејмс Коми, и обвинителката на Њујорк, Летиција Џејмс – пресудувајќи дека американскиот јавен обвинител, кого Трамп го назначил да ги гони, бил именуван незаконски, објави „Ројтерс“.

Одлуката ги поништува двата случаја за кои Трамп јавно повикуваше, додека ја притискаше раководната структура на Министерството за правда да покрене постапки против високи личности кои го критикуваа и водеа истраги против него.

Линдзи Халиган, некогашна лична адвокатка на Трамп, беше назначена како вршител на должноста обвинител за Источниот округ на Вирџинија во септември, за да ги води истрагите, иако претходно немала никакво обвинителско искуство.

„Обвинителката нема правно овластување“

Судијката Кери утврди дека Халиган „немала правно овластување“ да подигне обвиненија против Коми или Џејмс. Но, таа ги отфрли случаите „без предрасуда“, што значи дека Министерството за правда може да побара нови обвиненија со друг обвинител.

– Благодарен сум што судот го прекина случајот против мене – обвинение засновано на злоба и на неспособност, кое го отсликува тоа што Министерството за правда стана под Доналд Трамп – рече Коми во видео-објава на „Инстаграм“.

Сѐ уште не е јасно дали обвинителите ќе можат да покренат нов случај против Коми за истите дела. Рокот на застарување од пет години истече на 30 септември, а адвокатите на Коми веќе тврдат дека нема правни основи за повторно поднесување на обвиненијата.

Коми и Џејмс долго време беа мети на гневот на Трамп. Коми како директор на ФБИ ја надгледуваше истрагата за наводните врски на кампањата на Трамп во 2016 година со Русија, а подоцна јавно го прогласи Трамп за неспособен за функцијата. Џејмс, демократ по избор, успешно го тужеше Трамп и неговата семејна фирма за измама.

Трамп ѝ нареди на државната обвинителка Пем Бонди да ја постави Халиган на функцијата, откако нејзиниот претходник Ерик Сиберт одбил да покрене обвиненија против Коми и Џејмс, наведувајќи недостаток на докази.

Одлуката на судијката Камерон Мекгауан Кери доаѓа откако Коми и Џејмс го обвинија Министерството за правда на Трамп дека го прекршило Уставниот амандман за именувања и сојузниот закон со тоа што ја инсталирало Халиган во септември.

Халиган не чекала ни миг

Халиган веднаш по назначувањето сама покренала обвиненија против Коми и Џејмс, откако другите обвинители одбиле да учествуваат. Коми се изјаснил за невин за наводно лажни изјави и за опструкција на Конгресот, а Џејмс негирала вина за обвинувањата за банкарска измама.

Нивните адвокати тврдеа дека Халиган е именувана спротивно на федералниот закон, кој дозволува само едно привремено назначување на обвинител за 120 дена, а повеќекратните именувања го заобиколуваат Сенатот.

Министерството за правда тврдеше дека повеќе привремени назначувања се дозволени, а државната обвинителка Пем Бонди се обиде ретроактивно да ја зацврсти позицијата на Халиган со назначување за „специјален обвинител“, како и со формално „ратификување“ на обвинителниот акт.

Судијката Кери ги оцени сите овие обиди како невалидни.

Халиган веќе беше под судска критика, особено во случајот против Коми, каде што федерален магистрат укажа на можни сериозни грешки во презентирањето на доказите и упатствата до поротата.

Судијката дури се сомневала дали поротата ја добила финалната верзија на обвинението.

Поранешниот директор на ФБИ на суд: Џејмс Коми ги негира обвинувањата, тврди дека е жртва на одмаздата на Трамп