Победата на десничарската партија ВМРО-ДПМНЕ може да ја искомплицира целта на Северна Македонија за влез во ЕУ и да влијае на односите со соседите Бугарија и Грција, пишува Политико.

-Конзервативната партија во Северна Македонија треба да се врати на власт по седум години, постигнувајќи големи победи на парламентарните и претседателските избори во среда. Исходот се очекува дополнително да ја искомплицира долгогодишната амбиција на Северна Македонија за пристапување во Европската унија, како и нејзините односи со соседните Бугарија и Грција, пишува Политико во краткиот осврт синоќа по првичните изборни резултати од двојните избори.

Изданието нагласува дека на парламентарните избори победничката партија ВМРО-ДПМНЕ според првичните резултати од Државната изборна комисија освоила 59 пратенички места во парламентот, а Гордана Силјановска-Давкова, ќе стане првата жена претседателка во земјата со „главно церемонијална функција“.

-Гласачите во малата балканска земја со 2 милиони жители изразија фрустрација поради корупцијата, бавното темпо на реформите и бавниот напредок на кандидатурата на Северна Македонија за влез во Европската унија. Во 2018 година земјата постигна историски договор, менувајќи го името и уставот и ставајќи крај на деценискиот спор со Грција. Договорот му овозможи на Скопје да влезе во НАТО во 2020 година; Меѓутоа, во последните две години, Бугарија ја блокираше кандидатурата на Северна Македонија за ЕУ, барајќи да се измени нејзиниот устав за да се признае бугарското малцинство во земјата, потсетува Политико.