Полициските станици „нападнати“ од негрижа
Анализирајќи ги состојбите во просториите каде што се задржуваат приведените лица, двете невладини организации констатирале неадекватни услови и недостиг на административни канцеларии, на службени возила и на простории за разговор со деца.
На полициските станици им треба итна реконструкција, доопремување и изградба на нови специјализирани простории, констатираат во својот најнов извештај Хелсиншкиот комитет за човекови права и Македонското здружение на млади правници. Двете невладини организации ги анализираат состојбите во просториите на Министерството за внатрешни работи (МВР) каде што се задржуваат приведените лица. Инспекцијата е направена во објектите на што се наоѓаат во општините Центар, Битола, Велес, Куманово, Тетово, Штип, Кисела Вода, Струмица и Охрид.
За да се исполнат меѓународните стандарди за заштита на правата на лицата лишени од слобода, потребна е реконструкција на просториите за задржување и на тие за разговор со задржани лица, изградба на нови наместо старите што не ги задоволуваат стандардите, обезбедување доволно службени возила, приспособување посебни простории за разговор со деца, воспоставување функционален видео и аудионадзор во просториите за задржување и за разговор со задржани лица, пишува во Извештајот.
Од „презафатениот“ Центар приведените се носат во Бит-пазар и Кисела Вода
Полициската станица (ПС) Центар располага со само две административни канцеларии и со само една соба за разговор и една соба за задржување, се дел од забелешките.
„Особено загрижува што за лица со телесна попреченост нема соодветен пристап до собите за разговор и задржување. Просторија за разговор со деца воопшто нема во полициската станица, иако понекогаш се повикуваат деца на информативен разговор. Покрај недостигот од простории и административни канцеларии, полициската станица се соочува и со недостиг од службени возила. Така, станицата располага со само две интервентни возила, кои не се во исправна функција и честопати се сервисираат, а исто така се соочува и со недостиг од мотоцикли. ПС Центар поради местоположбата е доста фреквентна станица, но недостигот од материјално-технички услови доведува до тоа приведените лица честопати да бидат пренесени во најблиската полициска станица, како што се ПС Бит-пазар и ПС Кисела Вода“, се констатира во Извештајот.
Како е во Битола, Велес, Тетово…
Полициската станица во Битола, пак, немала пари на задржаните лица повеќе од шест часа да им обезбеди оброк, во просториите за задржување лица немало греење, а креветите во собите биле нечисти. Во другите простории не бил функционален видеонадзорот, а тоалетот бил нечист и немал врата со што им се повредува приватноста на лицата лишени од слобода.
Во Велес е констатирано дека собите се во подрум и не ги исполнувале условите во поглед на должина, ширина, висина, влажност, дневна и вештачка светлина. Тоалетот и таму бил валкан, без вода и сапун и со предмети што може да послужат за (само)повредување. Едната веце-кабина не била воопшто во функција.
Надлежните од Полициската станица Тетово се пожалиле дека имаат лоша соработка со Центарот за социјални работи од Гостивар, а исто така и со Основното јавно обвинителство Тетово кое многу често им дава насоки лицата лишени од слобода да бидат задржани, а кратко потоа наредува лицата да бидат ослободени. ПС Штип не поседува просторија за разговор со дете и не обезбедува пристап за лица со физичка попреченост, Во Штип имаат само едно за патролно и едно интервентно возило, кое е во полуисправна функција. Им недостигаат и канцелариски материјали (компјутери, тонери, принтери и сл.). Во ПС Струмица нема посебни простории за разговор со лица, а задржаните лица го користат истиот тоалет со вработените во полициската станица.