Македонската поетеса, писателка, преведувачка, професор и антрополог, Наташа Сарџоска, настапи на меѓународниот поетски фестивал „Офлајн“ во Истанбул, кој годинава од 31 октомври до 2 ноември се одржа по седми пат и на кој гостуваа поети од Велс, Холандија, Хрватска, Летонија, Малта, Романија и Турција.

Сарџоска гостуваше како поетеса и во Универзитетот „Једитепе“, каде што освен што читаше свои песни на македонски јазик, а во превод и на англиски и на турски јазик, се сретна со студентите од Катедрата по англиски јазик и книжевност, во рамките на нивниот курс по креативно пишување, и одговори на многубројни прашања во врска со креативниот процес на пишување поезија.

Покрај поетското претставување на Универзитетот, Сарџоска читаше песни и во книжевното кафуле „Антика Китап“, но и во Романскиот културен центар во рамки на истанбулскиот фестивал.

Авторката до сега има објавено шест поетски книги и два романа, како и бројни есеи, колумни, раскази и научни трудови. Нејзината поезија е преведена на повеќе од дваесет светски јазици.

(Текстот е објавен во „Културен печат“ број 255, во печатеното издание на весникот „Слободен печат“ на 9-10.11.2024)