Германската полиција се откажа од истрагата против Тил Лидеман, пејачот на германската метал група „Рамштајн“, за серија наводни сексуални вознемирувања, пишува „Би-би-си“.

Од обвинителството велат дека немањето докази ги навело да се откажат од истрагата.

Како потсетување, истрагата беше отворена во јуни годинава, откако неколку жени излегоа со сведоштва дека 60-годишниот Тил Линдеман ги врбувал за секс по концертите на „Рамштајн“.

Една од нив е и Шелби Лин од Северна Ирска, која верува дека ѝ била ставена дрога во пијачката и дека била „подготвувана“ на секс.

„Постои организиран систем на регрутирање девојки“, рече таа во интервју за „Би-би-си“.

Лин тврдеш дека, по концертот на „Рамштајн“ во Литванија, била спроведена во мала соба зад бината, каде потоа пристигнал и Линдеман. Таа раскажа дека заминала од собата откако сфатила дека станува збор за сексуална работа.

Нејзините обвинувања предизвикаа лавина признанија за сексуален напад, при што многу жени и девојки веруваат дека тие, како Лин, биле издвоени на социјалните медиуми од страна на една Русинка за да имаат секс со Линдеман.

Пејачот ги отфрли сите обвинувања, а неговите адвокати тврдеа дека тие се „без исклучок, неточни“.

Групата „Рамштајн“ е формирана во 1993 година и е позната по нивните театрални концерти и контроверзни текстови.