Градилиштето во скопската населба Ново Маало е заштитено и оградено набрзо по пријавата на граѓаните, поточно наредниот ден откако инспекцијата направила контрола на парцелата.

Ова го велат од Општина Центар откако жители на населбата се пожалија и испратија фотографии во „Слободен печат“ дека и покрај нивните пријави, надлежните, односно Општината и Град Скопје не презеле ништо.

Службите од Општина Центар, за да докажат дека не седеле со „скрстени раце“ туку постапиле и презеле активности согласно нивните надлежности, утрово на терен направиле фотографии од градилиштето, тврдејќи дека жителите испратиле стари фотографии, на кои се гледа дека сега тоа е оградено и безбедно за жителите и случајните минувачи на улицата.

Овластениот градежен инспектор на Општина Центар на 6.10.2025 изврши увид на самото место  на градежната парцела 13120/1, со инвеститор „Дабец“ и изведувач „Тими Инвест“ од Тетово, на улица Истарска број 21,  во населбата Ново Маало. При увидот, на инвеститорот му беше издадена усна наредба веднаш да го огради и обезбеди градилиштето. Веќе наредниот ден, инвеститорот постапил по дадената наредба – велат од Центар.

Како што веќе објави „Слободен печат“ жителите на Ново Маало од зградите на улиците Битолска и Истарска се пожалија дека постојано се изложени на бучава од тешка механизација, која според нив работи и надвор од работно време, а понекогаш багерите и камионите брмчат уште во раните утрински часови во недела. Од тешката механизација ангажирана на градилиштето е уништена и пешачката зона на улица Битолска, оштетена е шахтата за атмосферска канализација што, како што тврдат, предизвикало и прекин на водоснабдувањето. Секојдневно се исфрлало шут, цигли и гуми од градилиштето, а притоа немало ни заштитна ограда околу него со што сериозно е нарушена безбедноста на сите минувачи.

Граѓани тврдат дека повеќепати реагирале и во Општина Центар и во Град Скопје со барање да покажат одговорност, да постапат и да ги заштитат интересите на граѓаните наместо на градежните компании, да го спроведат законот, да обезбедат услови да се заштити нивната безбедност, здравје и мир и да се обноват оштетувањата. Според нив, најтрагично е што Битолска е пешачка улица неодамна обновена, поплочена била пред една година, токму од Општина Центар.

Навистина е мизерно народот да ја моли Општината да си го заштити јавниот имот за кој повторно ќе биде наплатено од џебот на граѓаните, додека градежните компании лудуваат и се заштитени како бели мечки – коментираат граѓани од Ново Маало.

Од Општина Центар негираат дека не се грижат за интересите на граѓаните и демантираат дека оштетувањата „повторно ќе бидат наплатени од граѓаните“.

За пешачката улица Битолска, која е обновена и поплочена со бекатон пред една година, а сега се оштетува од механизацијата која од тука влегува на градилиштето, од Општина Центар велат дека инвеститорот е обврзан по завршувањето на изградбата сѐ што оштетил да го врати во претходна состојба. Па така, на жителите им преостанува да се стрпат додека не заврши изградбата на соседната зграда.

Инвеститорот секоја штета што ќе ја направи вон градилиштето, по завршување на изградбата ќе мора да ја сервисира – велат од Центар.

Граѓани се жалат дека надлежните не реагираат: Во Ново Маало едно се гради, друго се уништува

Во однос на обвинувањата на граѓаните дека се фрла шут и друг отпад надвор од градилиштето, од Општината тврдат дека во моментов кога направиле увид немало шут.

Инаку, оваа населба, лоцирана веднаш до „Веро Џамбо“ до пред извесно време важеше за најруинирана населба со трошни куќи и тешки услови за живот на староседелците во Ново Маало. Во последните години таа се урбанизира и на местото на старите куќи никнуваат нови згради. Со оглед на нејзината местоположба, во близина на најстрогиот градски центар, оваа населба станува сѐ поатрактивна и за инвеститорите и за купувачите на станови.