Кремљ денеска изјави дека територијалното прашање останува фундаментално за Русија во постигнувањето договор за прекин на војната во Украина, објави државната новинска агенција ТАСС по трилатералните разговори во Абу Даби за време на викендот.

Претседателот Владимир Путин постојано повторуваше дека Русија ќе го заземе со воена сила целиот украински регион Донбас – од кој 90 проценти моментално се контролирани од силите на Москва – ако Киев не се согласи да го предаде како дел од мировниот договор.

„Не е тајна дека ова е наш цврст став, став на нашиот претседател, дека територијалното прашање, кое е дел од формулата од Енкориџ, е од фундаментално значење за руската страна“, изјави портпаролот на Кремљ, Дмитриј Песков, според ТАСС .

„Формулата Енкориџ“ се однесува на она што Русија вели дека било договорено меѓу американскиот претседател Доналд Трамп и Путин минатиот август на самитот во Алјаска, според извор близок до Кремљ.

Наводниот договор, според истиот извор, бара Украина да ја предаде контролата врз целиот Донбас на Русија и да ги замрзне фронтовските линии на други места во Источна и Јужна Украина како услов за каков било иден мировен договор.

Киев постојано повторува дека нема да ѝ даде на Русија територија што Москва не успеала да ја освои на бојното поле.

Според државната новинска агенција РИА, Песков рекол дека Москва позитивно го оценила она што тој го нарече „конструктивни разговори“ со Украина во Абу Даби.

Разговорите, под покровителство на САД, завршија без договор, но се очекуваат повеќе разговори следниот викенд.

Трамп добил покана за посета на Москва уште на Алјаска, посетата досега не е реализирана