Претседателот Стево Пендаровски денеска се сретна со Александар Тасевски, претседател на Струковиот синдикат на контролори на летање и Горан Гавровски, член на синдикалниот одбор.

Како што соопштија од кабинетот на Пендаровски, тој ги поддржал заложбите на синдикатот за одржување на професионалното ниво во функционирањето на М-НАВ АД – Скопје, која што е дел од критичната инфраструктура во државата.

Во оваа насока, претседателот Пендаровски уште еднаш го осуди насилничкото однесување во М-НАВ од страна на вработени во таа институција и други лица кои неовластено влегле во нивните простории и повика на расчистување на случувањата во најкус можен рок, имајќи предвид дека станува збор за потенцијално загрозување на безбедноста во меѓународниот авионски сообраќај – се вели во соопштението.

Истовремено, Пендаровски повторил дека ничиј личен или политички интерес не може да биде над правниот поредок и непреченото функционирање на институциите.