Ракометарите на Еурофарм Пелистер со сигурна победа ја затворија 2025 година, откако во последниот декемвриски натпревар ја совладаа екипата на Тиквеш со 29-21. Битолчани успеаја да се рехабилитираат по неуспехот во Охрид, прикажувајќи многу подобра игра и без поголеми проблеми ги освоија бодовите со кои остануваат во трката за самиот врв на Супер-лигата.

Тиквеш одигра солидно во првото полувреме и во еден период дури имаше и водство од 6-9, покажувајќи дека нема лесно да се предаде. Сепак, домашниот тим навреме го крена ритамот, ја стабилизираше одбраната и до паузата направи пресврт за предност од 12-10.

Во продолжението Пелистер целосно ја презеде контролата. Со серија од 5-1 во првите девет минути од вториот дел, битолчани ја скршија отпорноста на гостите (17-12), а разликата постојано растеше до самиот крај за конечни 29-21.

Најефикасен кај победниците беше Хакбарт со седум погодоци, додека Кузмановски и Петар Атанасијевиќ придонесоа со по четири гола. Во редовите на Тиквеш се истакна Јан Тајник со четири реализации.