Пекинг ги предупредува САД– Тајван одржува воени вежби против можен напад од Кина
Тајван одржа редовна воена вежба во главниот град Тајпеј за да се одбрани во случај на напад од Пекинг.
Во Тајпеј е прогласена воздушна тревога, а војската извршила заеднички воздушни и поморски маневри, како и мобилизација на тенкови и војници, како дел од петдневната годишна вежба „Хан Куанг“.
Кога беше прогласена тревога за воздушен напад, полицијата ги упати случајно избраните патници во метрото во засолништа.
Кина и Тајван имаат посебни влади од крајот на кинеската граѓанска војна 1945-1949 година. Оттогаш, Тајван ефективно функционира како независна земја.
Пекинг се противи на какви било официјални контакти на тајванската влада со други земји, бидејќи го смета Тајван за своја одметничка провинција, која треба да биде припоена со сила доколку е потребно.
Кина жестоко реагираше на неодамнешните медиумски извештаи за посетата на претседателката на Претставничкиот дом на САД, Ненси Пелоси на Тајван.
Портпаролот на Министерството за надворешни работи Жао Лиџијанг изјави за новинарите дека посетата „сериозно ќе го поткопа суверенитетот и територијалниот интегритет“ на Кина.
Пелоси, позната по нејзините остри критики кон Пекинг, иако најави, сепак ,не потврди дека ќе замине во Тајван. И американскиот претседател Џозеф Бајден минатата недела изјави дека американските воени претставници сметаат дека нејзината посета на тајванскиот остров во моментов „не е добра идеја“.