Пекинг ја повика германската амбасадорка во Кина откако министерката за надворешни работи Аналена Бербок го нарече претседателот Си Џинпинг „диктатор“, соопшти Берлин, во последното разгорување на тензиите меѓу земјите.

Иако тие се главни трговски партнери, врските Берлин-Пекинг се влошуваат откако членови на германската влада зазедоа построги ставови околу прашања од човековите права во земјата до ситуацијата со Тајван, пишува Гардијан. Бербок ги даде забелешките во интервју за американски Фокс њуз за време на посетата на САД.

Зборувајќи за војната во Украина, таа рече: „Ако Путин ја добие оваа војна, каков знак би бил тоа за другите диктатори во светот, како Си, како кинескиот претседател? Затоа Украина мора да победи во оваа војна“.

Портпаролот на Министерството за надворешни работи во Берлин потврди за АФП дека германскиот амбасадор „во неделата бил повикан во кинеското Министерство за надворешни работи“ во врска со забелешките.

Потврдата дека Кина ја повикала амбасадорката Патриша Флор дојде откако Кина претходно во понеделникот објави дека е „силно незадоволна“ од забелешките на Бербок.

„Коментарите се крајно апсурдни и се сериозно нарушување на политичкото достоинство на Кина и отворена политичка провокација“, рече портпаролката на Министерството за надворешни работи Мао Нинг.

Во јуни, Пекинг, наводно, го прекори американскиот амбасадор во Кина, откако претседателот Џо Бајден, исто така, го опиша Си како „диктатор“. Запрашана за протестите на Кина поради нејзините забелешки за време на посетата на Њујорк, Бербок одговори само дека ги „забележала“. Портпаролот на владата одби да коментира каков е ставот на канцеларот Олаф Шолц за забелешките.

Но, портпаролот додаде дека е јасно „дека Кина е управувана од комунистички, еднопартиски режим, а исто така е јасно дека тоа не одговара на нашата идеја за демократија“.

Ова беше трета неодамнешна прилика на Кина да ја повика германската амбасадорка. Пекинг, исто така, го стори тоа откако германскиот министер за образование го посети Тајван во март, што беше прва таква посета на островот во последните 26 години. Пекинг тврди дека Тајван како своја територија ќе биде заземена еден ден и го засили притисокот врз самоуправниот, демократски остров. Покрај тоа, германскиот претставник беше повикан по изјавата на министрите за надворешни работи на Г7 за Тајван во август 2022 година, кога Германија претседаваше со групата.

Германија зазема поостра линија против Кина и во јули објави нова политика против „понаметливата“ Кина по неколкумесечни расправии во владата околу нејзината стратегија. Тоа означува добра рамнотежа меѓу двете различни позиции во нејзината коалициска влада, нарекувајќи го Пекинг „партнер, конкурент, системски ривал“.

Бербок, од партијата на Зелените, повика на построг став и на поголем акцент на човековите права, додека Шолц, социјалдемократ, го поддржа ставот попогоден за трговијата.

Исто така, во Берлин се зголемува загриженоста за потенцијално ризичните кинески инвестиции дома и големата зависност на германските бизниси од водење бизнис во Кина.

Претходно оваа недела, извор потврди дека Германија го блокирала целосното кинеско преземање на сателитски стартап чија цел е да му се спротивстави на Старлинк врз основа на националната безбедност. Минатата година, владата во Берлин ја блокираше продажбата на два производители на чипови на кинески инвеститори поради безбедносни причини.

Предложената продажба на удел во пристаништето Хамбург на кинеска фирма предизвика жесток политички спор, но Шолц на крајот одобри купување на удел, иако со намалена големина.