Патронат на тетовската касарна: Одбележани 77 години од смртта на народниот херој Кузман Јосифовски Питу
Со полагање на цвеќе пред бистата на народниот херој, денеска беше одбележан патронатот на касарната „Кузман Јосифовски-Питу” во Тетово.
– Пред полагањето на цвеќе беше интонирана химната на Република Северна Македонија и химната на Армијата, а со едноминутно молчење се оддаде почит на народниот херој Кузман Јосифовски-Питу и останатите загинати и починати борци за слободата на Македонија и на загинатите припадници на Армијата. Пред присутните беше прочитан Реферат за ликот и делото на народниот херој Кузман Јосифовски-Питу, наведуваат од касарната.
На одбележувањето присуствуваше командантот на 1. механизирана пешадиска бригада, бригаден генерал Бесник Емини, претставници на Армијата и претставници на Сојузот на борци од Тетово и Гостивар, информираше командантот на касарната, потполковник Изеир Ејупи.
По повод патронатот на касарната „Кузман Јосифовски-Питу” беше реализирана крводарителна акција од вработените.
Кузман Јосифовски-Питу е роден на 15 јуни во 1915 година, а загинал на 25 февруари во 1944 година во Скопје. На 2 август во 1945 е посмртно прогласен за народен херој.