Драмедијата „Everything Everywhere All at Once“ е апсолутен победник на годинашното 95. издание на свеченото доделување на филмските награди Оскари, со кои Академијата за филмски уметности и науки ги награди најзаслужните имиња во филмската индустрија за изминатата година.

Приказната за кинеската иселеничка, која е затекната во луда авантура, каде таа сама може да го спаси светот преку истражување на други универзуми, беше номинирана за најголем број златни статуетки, дури 11, а успеа да победи во седум категории – најдобар филм, најдобра режија, најдобра актерка во главна улога, најдобар актер во споредна улога, најдобра актерка во споредна улога, најдобро оригинално сценарио и најдобра монтажа.

Актерката Мишел Јео испиша историја и стана првата актерка со потекло од Азија која ја освои престижната филмска награда.

„Ова е за сите малечки момчиња и девојчиња кои ме гледаат вечерва – ова е парче надеж дека е возможно. Дами, не дозволувајте да ви велат дека сте ги поминале вашите најдобри години“, изјави Јео откако ја прими статуетката за најдобра актерка во главна улога во филмот „Everything Everywhere All at Once“.

Ке Хуј Куан беше прогласен за најдобар актер во споредна улога и стана првиот актер со потекло од Виетнам кој освои Оскар.

„Мамо, јас освоив Оскар! Велат дека вакви работи се случуваат само во филмовите, не ми се верува дека ми се случи на мене“, изјави тој.

Исто така, ова е првпат во историјата на Оскарите повеќе азиски актери да освојат статуетки во иста вечер.

Легендарната Џејми Ли Кертис ја освои нејзината прва златна статуетка во нејзината долгогодишна актерска кариера во Холивуд и беше прогласена за најдобра актерка во споредна улога.

„Знам дека изгледа како да стојам сама пред вас, но јас во себе носам стотици луѓе“, изјави таа, пред да им оддаде почит на нејзините колеги од филмот „Everything Everywhere All at Once“, но и на нејзините блиски луѓе.

Даниел Кван и Даниел Шајнерт е трето режисерско дуо кое има освоено Оскар за најдобра режија во историјата на наградите. Тие им ја посветија оваа награда на нивните мајки.

Наградата за најдобар актер во отиде во рацете на Брендан Фрејзер, за неговата главна улога во филмот „The Whale“, победувајќи ги Остин Батлер, Колин Фарел, Пол Мескал и Бил Наји. Овој филм, исто така, ја освои наградата за најдобра шминка и фризура.

Воената драма „All Quiet on the Western Front“, која е филмска адаптација на истоимениот роман на Ерих Марија Ремарк од 1929 година, победи во четири категории – најдобар интернационален филм, најдобра музика, најдобра сценографија и најдобра кинематографија.

Меѓу другите победници се најдоа и „Guillermo del Toro’s Pinocchio“ за најдобар анимиран филм и „Navalny“ за најдобар документарец.

Водител на свечената церемонија беше комичарот Џими Кимел, кој преку своите шеги ја потенцираше потребата од елиминирање на родовата и расната дискриминација на Оскарите.

„Зошто Академијата не го номинираше мажот кој го режисираше ‘Avatar’? Што мислат тие, кој е тој? Жена?“, рече Кимел.

Исто така, тој не ја пропушти приликата да се пошегува за минатогодишниот скандал со Вил Смит и Крис Рок.

„Ако некој во овој театар изврши чин на насилство, во кој било момент за време на овој настан, ќе му биде доделен Оскар за најдобар актер и ќе му биде дозволено да одржи 19-минутен говор“, се пошегува Кимел.

Во продолжение, прочитајте ги победниците во поважните категории на годинашните Оскари.

„Најдобар филм“

• „All Quiet on the Western Front“
• „Avatar: The Way of Water“
• „The Banshees of Inisherin“
• „Elvis“
• „Everything Everywhere All at Once“ – победник
• „The Fabelmans“
• „Tár“
• „Top Gun: Maverick“
• „Triangle of Sadness“
• „Women Talking“

„Најдобра режија“

• Мартин Мекдона, „The Banshees of Inisherin“
• Даниел Кван и Даниел Шајнерт, „Everything Everywhere All at Once“ – победници
• Стивен Спилберг, „The Fabelmans“
• Тод Филд, „Tár“
• Рубен Остлунд, „Triangle of Sadness“

„Најдобро адаптирано сценарио“

• „All Quiet on the Western Front”
• „Glass Onion: A Knives Out Mystery”
• „Living”
• „Top Gun: Maverick”
• „Women Talking” – победник

„Најдобро оригинално сценарио“

• „The Banshees of Inisherin”
• „Everything Everywhere All at Once“ – победник
• „The Fabelmans”
• „Tár”
• „Triangle of Sadness”

„Најдобар актер во главна улога“

• Брендан Фрејзер, „The Whale“ – победник
• Остин Батлер, „Elvis“
• Колин Фарел, „The Banshees of Inisherin“
• Пол Мескал, „Aftersun“
• Бил Најли, „Living“

„Најдобра актерка во главна улога“

• Кејт Бланшет, „Tár“
• Ана де Армас, „Blonde“
• Андреа Рајзборо, „To Leslie“
• Мишел Вилијамс, „The Fabelmans“
• Мишел Јео, „Everything Everywhere All at Once“ – победник

„Најдобар актер во споредна улога“

• Брајан Глисон, „The Banshees of Inisherin“
• Брајан Тајри Хенри, „Causeway“
• Џад Хирш, „The Fabelmans“
• Бери Коган, „The Banshees of Inisherin“
• Ке Хуј Куан, „Everything Everywhere All at Once“ – победник

„Најдобра актерка во споредна улога“

• Анџела Басет, „Black Panther: Wakanda Forever“
• Хонг Чау, “The Whale”
• Кери Кондон, „The Banshees of Inisherin“
• Џејми Ли Кертис, „Everything Everywhere All at Once” – победник
• Стефани Кси, „Everything Everywhere All at Once“

„Најдобар интернационален филм“

• „All Quiet on the Western Front“, Германија – победник
• „Argentina, 1985“, Аргентина
• „Close“, Белгија
• „EO“, Полска
• „The Quiet Girl“, Ирска

„Најдобар документарец“

• „All That Breathes“
• „All the Beauty and the Bloodshed“
• „Fire of Love“
• „A House Made of Splinters“
• „Navalny“ – победник

„Најдобар анимиран филм“

• „Guillermo del Toro’s Pinocchio“ – победник
• „Marcel the Shell With Shoes On“
• „Puss in Boots: The Last Wish“
• „The Sea Beast“
• „Turning Red“

Целосната листа со победниците на годинашните Оскари може да ја прочитате тука.

Вести од сезоната на награди:

Златен глобус 2023: „The Banshees of Inisherin“ и „The Fablemans“ со блескава победа на годинашните филмски награди

„Critics’ Choice“ 2023: „Everything Everywhere All at Once“ прогласен за најдобар филм на годинашните награди

БАФТА 2023: „All Quiet on the Western Front“ со апсолутна победа на британските филмски награди

САГ награди: Доминација на драмедијата „Everything Everywhere All at Once“