Општина Аеродром бара екипите на јавното претпријатие „Комунална хигиена“ итно да ги испразнат контејнерите кои се преполни со ѓубре.

Општината во соопштение потсетува дека обврска и одговорност на секој менаџер, вклучително на директорите на јавните претпријатија и градоначалникот на Град Скопје е да воспостават и одржуваат систем за соодветно менаџирање на ресурсите со кои располагаат и на таков начин да обезбедат квалитетна услуга за граѓаните.

– Чистотата, јавната хигиена и одржување на здрава животна средина е јавен интерес од кој сите имаме бенефит. Делот на хигиената во Скопје кој е во надлежност на градските служби подолг временски период е во лоша состојба, а изминатите неколку денови, за жал градското јавно претпријатие „Комунална хигиена“ не успеа да најде начин како да го менаџира системот на одржување на чистата животна средина. Насекаде гледаме полни контејнери, а сите ние, граѓаните ја трпиме штетата од, неумесното и неодговорно менаџирање со јавното претпријатие. Преполните контејнери смет и лошиот мирис кој се шири во општината е одговорност на Градот Скопје и Јавното претпријатие „Комунална хигиена“. Граѓаните одговорно и навремено ја плаќаат комунална такса и тие заслужуваат чиста и средена општина. Токму поради тоа апелираме до надлежните, да ја тргнат политиката на страна и итно да изнајдат соодветно решение за собирање на сметот во  општина Аеродром – апелираат од општината.

Дел од вработените во „Комунална хигиена“ протестираат, а хигиената во Скопје е на многу лошо ниво. Директорката Косана Мазнева вчера рече дека група контролирана од политичка партија ја блокира „Комунална хигиена“ и спречува да се собира ѓубрето.