Дистрибутерската куќа „Катавеј“ од Скопје се приклучи во кампањата #СедиДома, овозможувајќи колекција од 200+ бесплатни филмови преку сопствената домашна онлајн видеотека „Синесквер“ (Cinesquare).

До крајот на месецот преку платформата бесплатно ќе може да се гледаат играни долгометражни филмови, документарци и кратки филмови само со регистрација на cinesquare.net или на Андроид-апликацијата.

– Колекцијата е достапна како резултат на добрата соработка со голем број дистрибутери и продуценти, со цел да одговори на потребите и очекувањата на публиката во овој тежок период, која ќе може квалитетно да исполни дел од своето време дома преку содржини што не се дел од каталогот на глобалните играчи, како и да придонесе против ширењето на вирусот – велат од „Катавеј“.

Не е заборавена ниту најмладата публика за која се достапни филмови со превод, како и синхронизирани филмови, меѓу кои и на македонски јазик. Платформата во соработка со Филмскиот фестивал за млади „Џифони Македонија“ го направи бесплатно достапен и детскиот каталог со промотивен код. „Синесквер“ е онлајн видеотека за изнајмување филмови базирана врз системот „видео на барање“ (Video on demand).

Платформата е активна во 13 земји од регионот и е фокусирана претежно на европскиот независен филм.

(Текстот е објавен во „Културен печат“ број 26, во печатеното издание на „Слободен печат“ на 10-12 април 2020)