Српскиот ракометен репрезентативец Никола Зечевиќ е ново засилување на ГРК Охрид, со кого потпиша договор до 2028 година.

Станува збор за лев бек, висок 200 сантиметри и на 24-годишна возраст, кој од следната сезона ќе настапува во дресот со број 31. Во Охрид доаѓа од редовите на Партизан, каде што имаше значајна улога во двата правци и ја носеше и капитенската лента.

Со своите настапи Зечевиќ се наметна и во репрезентацијата на Србија, каде веќе има повеќе настапи.

„Многу сум среќен и со нетрпение го очекувам мојот прв настап во дресот на Охрид. Не ми беше тешко да ја донесам оваа одлука и да ставам потпис со клубот, со оглед на големите амбиции на клубот кој расте од ден на ден на чело со тренерот Ројевиќ, кого го познавам долги години. Едвај чекам да заиграм пред охридската публика која прави неверојатна атмосфера и се надевам дека ќе ги оправдам очекувањата на сите луѓе во клубот и секако на навивачите и убеден сум дека заедно ќе ги исполниме зацртаните цели.“ – изјави Никола Зечевиќ.