Официјално: Земур влегува во претседателската трка против Макрон и Ле Пен
Ерик Земур по повеќенеделни шпекулации потврди дека влегува во трката за претседател на Франција на изборите што ќе се одржат во април следната година.
Овој политички новинар, есеист и писател, често споредуван со Доналд Трамп, се надева дека ќе успее да ја заживее својата кампања, откако дури и неговите поддржувачи го советуваа да промени нешто во неговите јавни настапи.
J'ai un message pour vous.
C'est maintenant sur ma chaîne YouTube :
➡️https://t.co/5hgjxrVr24— Eric Zemmour (@ZemmourEric) November 30, 2021
Веднаш штом се појави како еден од потенцијалните кандидати, Земур доживеа силен раст на анкетите, но сè брзо се промени откако долгогодишните соработници го напуштија, а неговите говори не ги исполнија очекувањата. Според последните анкети на Политико, Земур е само на третото место, далеку зад Макрон и Ле Пен.
Најниска точка овој десничарски ТВ новинар доживеа минатиот викенд кога беше снимен во Марсеј како им покажува среден прст на демонстрантите.
French presidential hopeful @ZemmourEric was in Marseille today and someone gave him the finger. He gave one right back 😂 pic.twitter.com/9UIhzcXcSG
— Chris Tomlinson (@TomlinsonCJ) November 27, 2021
Првиот официјален митинг како претседателски кандидат Земур ќе се одржи во недела во Париз и неговиот штаб се надева дека тогаш ќе ја покаже сета своја сила.
Земур е личност која користи запалива реторика за мигрантите и исламот и е обвинет за поттикнување поделби во Франција.
Тој го окупираше медиумите со неговите контроверзни погледи за миграцијата, што е едно од клучните прашања на овие претседателски избори. Тој, исто така, предложи повторно воведување на католички имиња за децата родени во Франција за да се подобри интеграцијата. Тој најави и дека се залага за депортација на сите странски деликвенти.