Естонскиот министер за одбрана Хано Певкур оцени дека соборувањето на дрон кој навлегол во воздушниот простор на балтичката членка на ЕУ и НАТО било оправдано, пренесе естонската ЕЕР.

„Како и секогаш, разгледавме различни фактори: Колку е голема опасноста за населените места? Какви опции за одговор се достапни? И врз основа на таа севкупна проценка беше донесена одлуката да се собори“, изјави Певкур во интервју за естонската телевизија.

Одлучувачки фактор за првото соборување на влезен дрон билa претпоставката дека ќе има минимална или никаква колатерална штета.

„За среќа, овојпат практично немаше штета – само мал дел од шума беше малку погоден“, рече Певкур, додавајќи дека дронот паднал на неколку стотини метри од станбена зграда.

„Соборувањето дрон е индивидуална одлука“

Во Естонија, која граничи со Русија, борбени авиони на НАТО во вторникот соборија дрон, за кој се претпоставува дека бил украински, а наводно бил насочен кон руски цели и навлегол во естонскиот воздушен простор. Дали дронот носел експлозив сè уште се истражува, според естонскиот министер.

Авион на НАТО собори украински дрон над Естонија, Киев се извинува

„Сепак, секој дрон носи гориво. Затоа, без оглед дали имал боева глава, тој секогаш претставувал опасност на земја“, рече Певкур.

Можното соборување би зависело од проценката на ризикот во секој поединечен случај и, пред сè, од потенцијалниот ризик за националната територија и населението.

Повторени инциденти со залутани украински дронови

Украина се брани од руска инвазија повеќе од четири години. Во двонасочната дронска војна, леталата против кои се дејствува со електронски средства претставуваат закана и за соседните земји.

Во неодамнешните украински напади, залутани дронови повеќепати навлегувале во воздушниот простор на балтичките држави и во некои случаи се уривале, посочи министерот.