Одложено судењето за „Титаник 1“ зашто Едмонд Темелко заминал на операција во Турција
Основниот кривичен суд Скопје извести дека судските расправи за предметот „Титаник 1“, закажани за в среда и в петок се одложени поради тоа што едниот од обвинетите, поранешен градоначалник на Пустец, Едмонд Темелко заминал на операција во Турција. Следниот термин за продолжување на главната расправа е на 28. февруари.
– Заради интерес на медиумите и невладините организации кои ја следат работата на судот, ја информираме јавноста дека термините за главната расправа за предметот со КОК бр. 59/22 од обвинителството означен како „Титаник 1“ насрочени за 15-ти и 17-ти февруари 2023 година се отповикуваат со оглeд да до судот е доставено известување дека обвинетиот Едмонд Темелко заминал на операција во Турција. Следниот термин за продолжување на главната расправа е на 28-ми февруари 2023 година во десет часот – соопштија од Основниот кривичен суд Скопје.
„Титаник“ е првиот случај за кој своевремено, на почетокот на 2016 година, Специјалното јавно обвинителство (СЈО) отвори истрага. Се однесува на кривични дела против изборите и гласањето за парламентарните избори во 2011 и 2014 и локалните избори 2013 година. По поднесувањето на обвинението, првото рочиште беше закажано во април 2018 година, а по укинувањето на СЈО, предметот го презема редовното обвинителство.
Во предметот вкупно беа обвинети 21 лице, на чело со тогашниот премиер Никола Груевски, а признавањето вина од осумтемина следуваше откако за тоа се отвори можност со оглед дека судскиот процес започна од почеток. За дел од обвинетите беа изречени условни и затворски казни, за некои настапи застарување, а против некои се уште се води постапка.