Нова рунда консултации меѓу Русија и САД ќе се одржи утре, четврток, во рускиот конзулат во Истанбул, објави во вторникот дипломатски извор.

Во февруари, претставниците на Русија и на Соединетите Држави одржаа разговори во Истанбул за да го вратат непреченото функционирање на нивните амбасади. Разговорите беа опишани како прв тест за нивната способност да ги обноват и прошират односите.

Руската новинска агенција ТАСС јави, повикувајќи се на Министерството за надворешни работи, дека консултациите во Истанбул ќе се одржат „во наредните денови“.

Руската делегација ќе ја предводи Александар Дарциев, кој неодамна беше именуван за амбасадор на Русија во Вашингтон. Соединетите Американски Држави ќе ги претставува заменик-помошникот државен секретар Соната Колтер.

Во двете делегации ќе има само дипломати, а разговорите ќе се фокусираат на нормализирање на работата на дипломатските претставништва на двете земји, велат од Москва.

Руски и американски претставници, исто така, се состанаа во февруари во Ријад, Саудиска Арабија, за да разговараат за тоа како да се стави крај на војната во Украина.