Научниците од Одделот за истражување на рак на Институтот за здравје во Луксембург открија револуционерен терапевтски потенцијал на соединението ФЛ3 (FL3) во инхибиција на онкогенска транслација и реконструкција на метаболизмот на канцерогените клетки.

Ова им дава нова надеж на пациентите со хронична лимфоцитна леукемија (ХЛЛ), широко распространета форма на рак кој се карактеризира со прекумерно производство и акумулација на дисфункционални Б-лимфоцити во различни делови од телото.

Користејќи примероци од пациенти и животински модели, истражувачите заклучија дека ФЛ3 конкретно таргетира група протеини наречени прохибитини, за кои се покажа дека се директно вклучени во транслацијата (клеточен процес на производство на протеини) на онкогени, конкретно генот MYC, во рамките на ХЛЛ клетките. Со прекинување на оваа интеракција, ФЛ3 го спречува започнувањето на транслацијата, всушност го нарушува тој процес и го запира растот на клетката на ракот, известува „Лабмате“ (Labmate).

За да се потврди ефикасноста на ФЛ3 во забавување на прогресијата на ХЛЛ, истражувачите спровеле „ин виво“ (in vivo) експерименти на глувци со неверојатни резултати, бидејќи третманот драстично го намалил процентот на ХЛЛ клетки во слезината и значително ги подобрил стапките на севкупно преживување. Поважно е тоа што ФЛ3 селективно ги таргетира малигните ХЛЛ клетки без да влијае на здравите Б-клетки, на тој начин обезбедувајќи охрабрувачка стратегија за селективна борба против клетките на ракот без да ги оштети здравите клетки.

Кога ФЛ3 бил комбиниран со анти-ПД1 имунотерапија, резултатите биле уште поимпресивни, покажувајќи дека ФЛ3 исто така може да го зајакне анти-туморскиот имунитет.