Австралискиот бел супремацист Брентон Тарант, сторителот на масакрот на 51 лице во две џамии во Крајстчерч, Нов Зеланд, во 2019 година, се појави денес во Апелациониот суд за да сведочи по својата жалба против неговата доживотна казна затвор, пренесува Еј-би-си њуз.

Брентон Тарант, 35, откако се изјасни за виновен, беше осуден во август 2020 година на доживотен затвор без можност за условна слобода, најтешката казна некогаш изречена во Нов Зеланд бидејќи смртната казна беше укината во 1989 година. Тој беше задржан во специјално одделение во затворот Окленд за затвореници со екстремно висок ризик, со малку контакт со надворешниот свет или други затвореници.

Појавувајќи се пред Апелациониот суд во Велингтон, убиецот тврдеше дека „нехуманите“ услови во кои бил задржан за време на неговото судење го направиле неспособен да донесе рационална одлука кога од него било побарано да се изјасни за виновен или невин.

„Немав бистрина на умот и ментално здравје потребни за да донесувам одлуки во тоа време“, изјави Брендон Тарант пред апелациониот суд, според извештајот на „Њу Зеланд Хералд“.

Тој додаде дека бил толку растроен што помислил да го вмеша американскиот претседател Доналд Трамп во неговото злосторство.

„Можам да кажам дека на покривот имаше втор вооружен човек, можам да кажам дека тоа беше Доналд Трамп“, изјави тој пред судот, според извештајот на RNZ.

Се очекува Апелациониот суд прво да одлучи дали неговото барање ќе биде одобрено.

На 15 март 2019 година, Брентон Тарант отвори оган со повеќе оружја, главно автоматски пушки, за време на петочните молитви во две џамии во Крајстчерч, голем град на Јужниот Остров, пренесувајќи го масакрот во живо 17 минути, откако претходно објави делиричен расистички манифест.

Сослушувањата во Апелациониот суд во Велингтон се одржуваат во присуство на медиумите, но без публика во судницата. На роднините на жртвите им е советувано да го гледаат судењето онлајн, преку видео, со задоцнување од околу еден час, од Крајстчерч.

Аја ал-Омари, чиј брат Хусеин беше убиен од Брендон Тарант во џамијата Линвуд, изјави за „Прес“ во Крајстчерч дека мислела дека сè е „завршено“ кога Брентон Тарант беше осуден во 2020 година.

„Не знаев дека може да се направи ова шест години подоцна. Не бев подготвена за нешто вакво“, додаде таа, осврнувајќи се на жалбата.