Нов роман: „Боксерот од Ново маало“ од Владимир Плавевски
Главни точки во романот „Боксерот од Ново маало“ на авторот Владимир Плавевски се животот и духот на Ново маало во старото Скопје и уникатната приказна за вистинскиот лик со измислено име, Ангел Тотевски или Шуре Катиљ, кој од уличен тепач станува успешен боксер во клубот „Вардар“ и маалска легенда. Наратор во романот е младиот Владо, кој е познат по тоа што сака да чита и во маалото го викаат „Читачот“. Во овој лик е пресликан Плавевски во неговото детство и приказната ја раскажува тој низ многубројните дружби со Шуре Катиљ.
Авторот е познат како хроничар на старото Скопје и голем дел од неговите книги гравитираат околу секојдневието во маалото каде што го минал детството, а таков е и случајот со „Боксерот од Ново маало“. Делото е издание на „Арс либрис“, дел од „Арс ламина публикации“.
Владимир Плавевски (1948, Скопје) е автор на повеќе драмски текстови, сценарија за телевизиски серии, ТВ-филмови и радиодрами. Само во издавачката куќа „Арс ламина“ има објавено четири дела: „Динга стоп: скопски приказни од Ново маало“, „Вампирџија“, „Туѓо тело“ и „Боксерот од Ново маало“. Во 2013 година ја доби наградата Роман на годината на „Утрински весник“ за романот „Јадица“. Од 2000 година е член на Друштвото на писателите на Македонија.
(Текстот е објавен во „Културен печат“ број 62, во печатеното издание на „Слободен печат“ на 26-27 декември 2020)