Њујорк, Њу Џерси и крајбрежните заедници долж Источниот брег денес добија предупредувања за снежна бура што се очекува да пристигне во недела. Предупредувањето е на сила за повеќе од 14 милиони луѓе, а за градот Њујорк ова е прво такво предупредување во последните девет години, пишува Си-би-ес њуз.

Националната метеоролошка служба ја заостри својата прогноза за бура што само неколку дена претходно беше најавена како помалку сериозна. Сега тие велат дека во многу области би можеле да наврнат помеѓу 30 и 60 сантиметри снег. Предупредувања за снежна бура се издадени за Њујорк Сити, Лонг Ајленд, јужен Конектикат и крајбрежните заедници во Њу Џерси и Делавер.

Снег од 15 до 45 сантиметри е можен низ североистокот, додека помали количини се очекуваат во средноатлантската област. Метеоролозите, исто така, известија за можни поплави во делови од Њујорк и Њу Џерси.

Според прогнозите, бурата би можела да започне постепено во текот на неделата, со малку дожд, пред условите да се влошат. Најобилни снежни врнежи се очекуваат во недела навечер, кога би можеле да паднат со интензитет од 2,5 до 5 сантиметри на час, а локално е можен и посилен интензитет, со повеќе од 5 сантиметри снег на час.

Метеоролошката служба предупреди дека бурата, со постојани ветрови од 40 до 56 км/ч, ќе го направи патувањето опасно, дури и невозможно. Се очекуваат тешки услови за патување низ целиот регион. Може да се скршат гранки и прекини во електричната енергија поради тежината на снегот и силните ветрови.

Бурата се приближува токму кога остатоците од мразот од снежната бура што го погоди регионот пред неколку недели конечно почнуваат да се топат. Сепак, се чини дека зимата сè уште не е завршена.