Несовесни граѓани искршиле и целосно уништиле три ормани за струја кои биле поставени во урбаниот парк зад ТЦ „Бисер“.

– Општина Аеродром упатува остра реакција по вандалскиот чин кој се случил во урбаниот парк зад ТЦ „Бисер“, при што беа искршени и целосно уништени орманите за струја. Непознати сторители целосно откорнале три ормани за струја, а нанеле штета и на други елементи поврзани со електрична енергија – информираат од Општина Аеродром.

Оттаму најавуваат и дека, случајот ќе биде пријавен и како што велат, очекуваат сторителите да бидат пронајдени и соодветно казнети.

– Ваквите девијантни појави не само што нанесуваат големи материјални штети кои ги плаќаме сите ние, туку претставуваат и голема опасност по животите, како на сторителите, така и на жителите на нашата Општина. Уште еднаш апелираме сите заедно да ги чуваме и да се грижиме за јавните добра, затоа што само на тој начин ќе имаме здрава, чиста и безбедна животна средина – апелираат од оваа локална самоуправа.