Министерот за здравство Азир Алиу најави дека здравствениот систем во Македонија ќе премине на целосно електронско водење на медицинската документација.

Според предложените измени на Законот за евиденциите од областа на здравството, упатите, рецептите, извештаите и регистрите ќе се чуваат дигитално, додека, пак, хартиената документација ќе се користи само исклучително, на пример при евентуален прекин на системот.

Се воведува е-здравствено досие

Со измените се воведува и електронско здравствено досие за секој пациент, кое ќе ги обедини сите здравствени информации – од прегледи и резултати до упати, рецепти и телемедицински услуги.

Министерот посочи дека граѓаните ќе имаат полесен пристап до сопствените здравствени податоци преку електронски портал или мобилна апликација, со јасни правила за пристап кај малолетници и можност за овластување друго лице.

Системот ќе функционира преку Националниот систем за електронски евиденции во здравството „Мој Термин“, а сите јавни и приватни здравствени установи ќе мора да користат информатички системи усогласени со него.

— Нашата цел е здравствените податоци да се водат модерно, безбедно и поврзано, со што ќе се подобри и квалитетот на здравствените услуги за пациентите. Со ова законско решение, кое деновиве ќе биде поставено на ЕНЕР (Единствен национален електронски регистар на прописи на Р. Северна Македонија), се надминуваат досегашните ограничувања во системот на здравствени евиденции и се овозможува нивно целосно електронско водење преку Националниот систем за електронски евиденции во здравството „Мој Термин“ — појасни Алиу.

За таа цел се предвидува сертифицирање на здравствените информатички системи и задолжително евидентирање на секој пристап до здравствените податоци за поголема безбедност и транспарентност.

Со закон се воведува електронско пријавување заразни болести

Услугите оддалеку ќе имаат иста правна важност како прегледите

Со законските измени се регулира и интеграцијата на телемедицината и мобилното здравство, при што услугите дадени на далечина ќе имаат иста правна важност како и класичните прегледи. Предвидена е и можност за користење анонимизирани здравствени податоци за научни истражувања, статистика, образование и креирање здравствени политики, но со строга забрана за нивна употреба што би довела до дискриминација или до економска штета за поединец.

Предлог-законот предвидува и интеграција на сите здравствени регистри во рамки на националниот систем, како и зајакнување на стандардите за информациска безбедност, со обврска здравствените установи да воспостават системи за управување со безбедноста и да пријавуваат евентуални инциденти.

Според Алиу, измените се делумно усогласени со европските регулативи за дигитално здравство, вклучително и со регулативата за Европскиот простор за здравствени податоци.

Тој додаде дека министерството работи и на измени на уште 12 закони од здравствениот сектор, кои постепено ќе се објавуваат на платформата ЕНЕР.

Дел од нив веќе се поставени, меѓу кои законите за здравствена заштита, за заштита од пушење и за здравствено осигурување, додека во Законот за заштита на населението од заразни болести се планираат нови решенија поврзани со дигитализацијата на системот.

За ставање лек на позитивна листа ќе се аплицира електронски