Нема никакво ,,исчезнато бебе” на Клинички Центар во Скопје, жената лажела дека била бремена и е лишена од слобода
Минатата вечер јавноста во земјава беше вознемирена од лажна пријава која ја пренесоа и дел од медиумите, дека наводно ,,петмесечно бебе исчезнало од Клинички центар” а родителите случајот го пријавиле во полиција. На социјалните мрежи се шпекулираше дека бебето било украдено, што предизвика вознемирување кај граѓаните и паника. Но, станува збор за лажна пријава, бебето не постои туку е измислица на жената пријавителка која што и донесе проблеми со законот. Како што за ,,Слободен печат” изјавија од Клиниката за гинекологија и акушерство, оваа жена последен пат кај нив се породила во 2019 година и нејзиното дете има 4 години. Оттогаш на ГАК таа не стапнала. Според лажната пријава што жената ја дала во МВР, ,,таа родила бебе на ГАК пред неколку месеци, кое потоа било пренесено на Детска клиника и исчезнало”.
Скандалозната лага придонесе вчера во двете клиники пациентите да бидат исклучително вознемирени, особено мајките на новородени бебиња на ГАК. Ваква лажна пријава е куриозитет и не се случила досега во историјата на ГАК.
,,Слободен печат”се обрати во МВР од каде ни кажаа дека пријавата за наводно исчезнато дете во Клинички центар е лажна.
Пријавителката е лишена од слобода. МВР ја известува јавноста дека во координација со Основното јавно обвинителство Скопје го расчисти случајот со наводно исчезнато дете на Клинички Центар и утврдено е дека станува збор за лажна пријава од страна на Л.А. Веднаш по добиената пријава од страна на Единицзта за насилен криминал при СВР Скопје преземени се соодветни мерки и активности. Направени се детални проверки во системот на Гинеколошко акушерската клиника во Скопје за примени пациенти и притоа констатирано е дека Л.А. последен пат е хоспитализирана во 2019 година. Исто така направени се проверки во системот на Детска Клиника и притоа не е забележано новородено дете како што пријави Л.А. Направени се проверки во ординацијата на матичниот лекар на Л.А и притоа констатирано е дека таа била на преглед на 8 март 2023 година каде што од страна на докторот е констатирано дека таа не е бремена. Извршен е разговор со докторот и од прибраните докази е констатирано дека пријавата на Л.А. е лажна. Во консултација со дежурен јавен обвинител Л.А. е лишена од слобода и задржана во полициска станица за понатамошно постапување.