„Не може во медицина да делите кадар по јазик“: Реакции по конкурсот за упис во „Панче Караѓозов“
„Не може во медицината да делите потребен кадар по јазик. Кадарот се вработува според потреба на болниците“, рече денеска Гордана Бешлиовска од Унијата за здруженија на медицински сестри, техничари и акушери, во реакција на конкурсот на скопското Средно медицинско училиште „д-р Панче Караѓозов“ во кој за упис на насоката за акушерки годинава не се предвидени паралелки кои ќе учат на македонски јазик, објави „Канал 5“.
За Бешлиовска, двата смера воопшто немаат сличност, и не може медицинските сестри да конкурираат за оглас за акушерки. Таа објаснува дека сестрите во образованието точно добиваат каков профил на сестра ќе оди. „Не може медицина да се меша со националност – медицинската сестра се едуцира со цел да има подобро образование во дејноста која ќе ја врши“, вели Бешлиовска.
Од здружението ќе реагираат до институциите кои одлучуваат.
Маја Салиу, директорката на средното училиште „д-р Панче Караѓозов“ за „Канал 5“ пред два дена објасни дека за уписот за средното училиште се зголемила една паралелка на Македонски јазик кај медицинските сестри, а кај смерот за акушерки е само на Албански јазик. Таа вели дека нема разлика меѓу двете насоки и дека нема дискриминација за ниту еден нов ученик во ова училиште.