Накитот што некогаш му припаѓал на Наполеон Бонапарта ќе биде понуден следната недела на аукциите во Женева, а особено внимание привлекува прстенот со синиот дијамант од 9,51 карат, чија вредност се проценува на меѓу 20 и 30 милиони долари.

На аукцијата на „Сотби“, која ќе се одржи на 12 ноември, ќе се најде и брош на Наполеон, што го пронашле припадниците на пруската војска по Битката кај Ватерло, пренесе „Фигаро“.

Овој брош, чија вредност се проценува меѓу 130.000 и 220.000 евра, се наоѓал меѓу личните предмети што императорот морал да ги остави зад себе додека бегал од англиските и пруските војници по прочуената битка.

Во центарот на кружниот брош, со дијаметар од околу 45 милиметри, се наоѓа голем овален дијамант од 13,4 карата, опкружен со речиси стотина мали дијаманти распоредени во два реда.

На аукцијата на „Кристи“ ќе биде понуден и прстен со син дијамант со исклучителна чистота, познат под името „Мелон Блу“, затоа што во 20 век со децении ѝ припаѓал на американската филантропка и колекционерка на уметнички дела, Бани Мелон.