Доколку некогаш сте размислувале за пензионирање во странство, постојат повеќе фактори што треба внимателно да се земат предвид. За среќа, годишниот извештај на порталот „Интернешнл Ливинг“ (International Living) за најдобрите дестинации за пензионери ги анализира клучните аспекти – од трошоците за живот до леснотијата на преселување за странски државјани.

Меѓу најважните критериуми се визните услови, здравствениот систем и климата. По анализа на 195 земји, истражувањето ја прогласи Грција за најдобра дестинација за пензионирање во 2026 година. Земјата нуди пријатна, топла клима и активна заедница, а странците можат да изнајмат куќа со три спални соби и поглед кон море за околу 900 фунти месечно, пренесува „Експрес“ (Express).

Според податоците на International Insurance, грчкиот здравствен систем комбинира јавно осигурување и приватни здравствени услуги. Пензионерите можат да плаќаат приближно 250 евра месечно за приватно здравствено осигурување и да добијат, како што се наведува, „постојано добар“ квалитет на здравствена нега.

Грција има и висок број медицински специјалисти во однос на бројот на жители, а итната медицинска помош е бесплатна за сите – вклучувајќи ги и странците. Аптеките, амбулантите и центрите за примарна здравствена заштита нудат дополнителни услуги, а аптеките во помалите места често се опремени и за интервенции во полесни итни случаи.

На второто место на листата за 2026 година се најде Панама, земја која привлекува пензионери со развиена заедница на странци и пристапна здравствена заштита, вклучувајќи модерен приватен сектор и медицински персонал што зборува англиски јазик.

Меѓу првите десет дестинации се најдоа и популарни европски земји како Шпанија, Португалија и Италија, кои традиционално се омилени меѓу пензионерите.

Топ 10 земји за пензионирање во 2026 година:

1. Грција

2. Панама

3. Костарика

4. Португалија

5. Мексико

6. Италија

7. Франција

8. Шпанија

9. Тајланд

10. Малезија